Grænmetisréttur

Einn minn stærsti ótti í lífinu er hræðslan mín við að verða svangur. Ástæðan er sjálfsagt sú að í gegnum tíðina þá þegar ég verð svangur fæ ég hausverk eða mígreniskast. Þegar fólk sem er ekki með mígreni segist vera með hausverk þá langar mig að setja á það Andrés önd plástur og segja æi litla greyið er hausverkurinn núna farinn? sem reyndar ég held að virki. Þessi pistill átti nú ekki að fjalla um það. Annar af mörgum óttum í lífinu er sá að "hvernig fer fólk að sem borðar ekki kjöt"? Ég tilheyri semsagt hópi fólks sem borðar kjöt og mikið af því en núna í þessari viku þá er ég búinn að gera tilraun að borða ekki rautt kjöt. Ég gekk meira að segja svo langt að henda, baconi, skinku og pulsum úr ísskápnum til að freistast ekki. Vandamálið mitt er hinsvegar það að ég borða ekki fisk! Á mínum yngri árum voru þetta "helvítis dillur" eins og ástkær móðir mín segir svo oft en á mínum eldri árum hef ég reynt en það hefur lítinn árangur borið. því miður. Það er eitthvað við sjávarbragðið sem ég þoli ekki. En ég er þó búinn að læra að borða humar og risarækjur(sem fást víst ekki heima). En vandamálið við að borða ekki fisk og ætla að sneiða hjá rauðu kjöti er þá það að eftir stendur kjúklingur og kalkúnn! En hinsvegar þá má ekki gleyma grænmetisréttum sem hingað til hefur verið svona "tekið til í kælinum" ástand. Kannski verður breyting á því í framtíðinni, hver veit? Ég er nú ekki hættur að borða rautt kjöt en sé hvað þessi tilraun mín getur staðið lengi :-) 

Hérna kemur einmitt uppskrift af grænmetisrétt sem ég eldaði mér núna í hádeginu. 

1 stk lítil sæt kartafla.

1/3 af meðalstórum Blómkálshaus. 

1/2 laukur 

2 hvítlauksrif

ca 2 cm Engiferrót. 

1 msk philadelphia ostur 

1 msk hnetusmjör. 

lófafylli af Kasjú hnetum 

Fyrst var allt grænmetið skorið niður í viðráðanlegar stærðir og steikt á pönnu þar til vel mjúkt. 

Því næst var hnetunum bætt við. 

Slettu af vatni ásamt philadelphia ostinum og hnetusmjörinu bætti útí. Það látið bráðna niður og hrært vel í á meðan þar til þetta var tilbúið. 

Flóknara var það nú ekki. 

Njótið 

Daginn eftir Tælensk kjúklingasúpa

Eins og þetta langa og greinargóða nafn gefur til kynna þá er það einmitt þannig sem við nýttum afganginn af tælensku kjúklingasúpunni sem sjá má hér. http://gunnarbjarnason.blog.is/blog/gunnarbjarnason/entry/1475791/

þar sem við höfðum sett til hliðar kjúkling fyrir krakkana þá var tilvalið að nota hann þar sem krakkarnir átu súpuna eins og engin væru morgundagurinn. Einnig var afgangur af hrísgrjónunum frá þvi daginn áður. 

Þannig að við notuðum afganginn frá því daginn áður, settum kjúklinginn sem við höfðum sett til hliðar, restina af hrísgrjónunum. So rifum við niður ost og settum yfir, þessu stungið inní ofn þar til þetta var tilbúið. Kannski 15-20 mínútur. Í þessu tilfelli þurfti ekkert annað að gera en að blanda þessu öllu saman, stundum gæti þurft að "lífga" aðeins uppá þetta með kryddum en það slapp núna :)

Þetta var frábært!

 

Tælensk kjúklingasúpa

Tælensk fannst mér hljóma vel þótt að hún hafi í sjálfum sér ekki haft neitt vegabréf blessunin. 

Í flensunni sem gekk yfir í síðustu viku var ákveðið að gera kjúklingarétt. Einhvern veginn á miðri leið breyttist þessi réttur í súpu, sem var alls ekki slæmt.

Í súpuna notaði ég.

2 kjúklingabringur. smátt skornar.

1 laukur smátt skorinn

3 hvítlauksrif smátt skorin.

1 parpika skorin í litla strimla.

3 cm Engifer. Skorið í strimla.

4 sveppir skornir í litlar sneiðar

1 dós kókosmjólk(án eðlunnar sem fannst í krónunni)

500 ml vatn.

Kjúklingakraftur 

1 bolli Hrísgrjón . til að setja í botninn á skálinni.

Chillikrydd(átti ekki ferskan chilli) best væri að nota Einn ferskan chilli, með fræjum ef maður vill hafa hana sterkari, annars án fræja.

Salt og pipar.

Hrísgrjónin eru soðin í potti, ég hef farið yfir þetta áður. 1 hluti hrísgrjón, 2 hlutar vatn. Soðin þar til að vökvinn er nánast búinn. þ.e. kominn af yfirborði hrísgrjónanna. þá er slökkt undir. ca. 15-20 mín seinna eru grjónin tilbúin.  

Kjúklingurinn er steiktur þar til hann er tilbúinn og settur til hliðar.  Kryddaður með salti pipar og chilli. 

Laukurinn og hvítlaukurinn eru steiktir í stutta stund uppúr olíu í potti sem á að nota undir súpuna. Paprikunni, engiferinu og sveppunum er bætt útí og steikt í svolitla stund. Hljóma 5 mínútur vel? Kryddað með salti, pipar og chilli.  Vatninu bætt í pottinn ásamt kjúklingakraftinum. Þessu er leyft að sjóða í ca 10 mín. Þá er kókosmjólkinni bætt útí, leyft að sjóða í 3-4 mín, kjúklingnum bætt útí, hrært saman og smakkað til með salti og pipar.

Súpan er borin fram þannig að það eru sett hrísgrjón í botninn(má setja soya sósu og/eða sweet chilli sósu) á skál og súpan sett þar yfir. Meira að segja þá sló þetta í gegn hjá krökkunum. 

Verði ykkur að góðu.  

 

 

 

Gulrótar og tómatsúpa.

Uppskrift af þessari súpu fann ég inná ljúfmeti. Ég held að einhver hafi "lækað" þetta á facebook. En það skiptir kannski ekki höfuðmáli hvar eða hvernig þessi uppskrift fannst. hún stendur fyrir sínu. 

Hugsanlega fellur þetta inní 248kr rammann hjá fjármálaráðuneytinu. hver veit.

Allavega þá var þetta innihaldið.

Olívuolia til að steikja uppúr. 

8 meðalstórar gulrætur

4 frekar stórir tómatar.

1/2 laukur.

2 hvítlauksrif.  

1 dós kókosmjólk.

salt og pipar.  

kúmen or kóríander krydd.  

Kjúklingakraftur. 1-2 tengingar.  

Vatn, rétt til að fljóta yfir hráefnið þegar það var komið í pottinn.  

Laukurinn og hvítlaukurinn eru skornir smátt niður og mýktir vel í potti(nógu stórum fyrir súpuna).

Tómatarnir og gulræturnar eru skornar smátt niður og bætt útí pottinn. þetta er kryddað með salti, pipar, kúmeni og kóríander. Steikt í svona um það bil 2-3 mínútur og hrært vel í á meðan.

Vatninu er bætt útí þar til það flýtur rétt yfir hráefninu. Þessu er leyft að sjóða við vægan hita í ca. 15-20 mínútur eða þar til gulræturnar eru orðnar mjúkar. Ég setti einn kjúklingatening útí og bætti við salti og pipar. Að tímanum liðnum þá er súpan maukuð í pottinum með töfrasprota, Okkar sproti hefur nú ekki meira töfra en það að hann getur rétt framleitt hávaðann sem þarf til þannig að súpan var smá "chunky" þó alls ekki verri fyrir vikið. Kókosmjólkinni bætt útí og smakkað til með með meira salti, pipar og jafnvel kjúklingakrafti.

Þetta var unaður í súpuskál. 

Gunnversk Gúllassúpa

Gúllassúpur geta verið frábærar. Eins og þessi. 

Innihald í þessa súpu var. 

1 kg gott nautagúllas.

1 papríka.

1 laukur.

3-4 hvítlauksrif.

ca 200 gr. Sveppir.

4 kartöflur.

4 gulrætur

200 ml rjómi. 

1 líter vatn

kjötkraftur

 Svo má bæta við rjómaosti en hann átti ég ekki að þessu sinni. Einnig má nota kókosmjólk, langar að prófa það næst. Allavega þá fóru herlegheitin þannig fram að þessu sinni.

Kjötið er skorið í lítla gúllasbita, við erum svo heppinn að þeir skera fyrir okkur í búðinni við hliðina hjá(eins og krakkarnir segja). Kjötið er brúnað mjög vel í meðalstórum potti, saltað og piprað vel, ég setti líka chillikrydd, svo má bæta við nánast þeim kryddum sem maður vill, t.d. kúmen og kóríander. Líter af vatni bætt útí. Þessu er leyft að sjóða í ca. klukkutíma. Laukurinn og hvítlaukurinn er skorinn smátt og steiktur á pönnu þar til hann er mjúkur, muna að það þarf ekki mikið til að brenna hvítlaukinn. Sveppirnir er skornir í sneiðar, paprikan er skorinn í ræmur, þessu er bætt við og steikt í smá stund eða þar til grænmetið er allt saman mjúkt og tilbúið. Ég leyfði þessu svo að bíða á pönnuni. 

Kartöflurnar og gulræturnar eru skornar í munnstóra bita. Þegar um 40 mín eru eftir af suðutímanum,  þá er kartöflunum bætt útí pottinn og þegar ca 20 mín eru eftir af suðutímanum er gulrótunum(mega vera lengur ef vill) ásamt restinni af hráefninu bætt útí. Á þessum tímapunkti setti ég 1 nautatening, svo meira salt og pipar, ef ykkur finnst þetta og dauft má auka við annað hvort kjötkraft, salti, pipar eða chilli. Ég var að hugsa um krakkana. þetta fer allt eftir því hvað maður vill hafa þetta sterkt, saltað eða piprað eftir þörfum. Rjómanum bætt við í blálokin og hrært vel saman við í nokkrar mínútur. 

 

Gunnversk gúllassúpa. gjöriði mér svo vel.  

 

 

 

 

Omilettuvefja með kartöflum og papriku

Sunnudagsmorgunmatur á að vera góður. Það er bara þannig.

Í morgun var einmitt einn slíkur en við höfðum ommilettu með kartföluteningum og papriku  

Í þetta var notað(fyrir 2)

4 egg

4 meðalstórar Kartöflur

1 Rauð paprika, ef fólk hefur sérstakar kenndir fyrir öðrum lit af papriku þá er það frjálst val

dill, sal og pipar

Kartöflurnar er skornar í litla teninga og steiktar á pönnu þar til þær eru næstum tilbúnar, kryddaðar með salti, Pipar og Dilli, paprikunni er bætt við og steikt með þar til allt er tilbúið. Sett til hliðar.  Eggin eru hrærð og steikt sem ommiletta. Þegar ommilettan er tilbúin er hún færð uppá disk, kartöflu,papriku blandan set í rönd í miðjuna, sitthovrri hliðinni rúllað að miðju og restinni af kartöflunum raðað fallega(eða eins og á myndinni)  til hliðar við vefjuna. 

 þetta klikkaði ekki.

 

Súkkulaðikaka eða kaka í potti.

Ég held ég byrji allar Bökunarfærslur á því sama. Hún Helena mín hefur séð um baksturinn á þessu heimili. Hún heldur því áfram í þessari færslu og stendur sig alltaf eins og hetja.

Ein vinsælasta kakan á þessu heimili ásamt marengskökunni, sem við komum að síðar, er kaka í potti eins og hún kallar, ástæðan fyrir þessari köku er sú að hérna í Tyrklandi búum við ekki svo vel að eiga hrærivél og þessi hentar vel í svona hrærivélalausan bakstur.  þessi er alveg yndislega fáránlega góð súkkulaðikaka.

Innihald 

130 gr mjólkursúkkulaði

130 gr dökkt súkkulaði

180 gr smjör 

 2 tsk neskaffi, þetta fer svolítið eftir stemmningunni hverju sinni. Stundum meira kaffi, stundum minna. Stundum ekki neitt. 

2 dl Sykur

4 Egg

2 tsk vanillu sykur

1/2 tsk lyftiduft

1/2 Dl. hveiti.

Aðferð 

Ofninn er hitaður í 175°C. 24 cm bökunarform er smurt að innan með smjöri og bökunarpappír er settur í botninn.  Súkkulaðið er brotið niður, brætt við vægan hita ásamt smjörinu og hrært í að meðan með písk. Potturinn er tekin af hellunni og látið kólna í smá stund. Á meðan e rneskaffið mulið í morteli mjög smátt og bætt útí pottinn ásamt sykrinum og eggjunum. Þetta er hrært vel saman með písk þar til blandan er orðin slétt. 

Hveiti, Vanillusykri og lyftidufti er blandað saman og sigtað ofaní pottinn, aftur er þetta pískað saman þangað til að blandan er orðin slétt. 

Deiginu er hellt ofaní bökunarformið og bakað í ca. 45-50 mínútur eða þangað til að það hættir að heyrst "bubbluhljóð" þegar maður leggur kökuna uppað eyranu, án þess að brenna sig þó  en muna að fylgjast með vel kökunni þar sem hún má vera blaut í miðjunni.  

Kremið.

70 gr dökkt súkkulaði.

70 gr mjólkursúkkulaði.

1 msk smjör

1 msk mjólk.

þetta er brætt og  hrært vel saman þar til það er búið að ná réttri þykkt á kremið, stundum meiri mjólk eða minni, allt fer eftir hvað maður vill hafa kremið þykkt. það má setja á kökuna þótt hún sé ennþá heit.  

Ef svo ólíklega vill til að það sé eitthvað eftir af kökunni þá er hún alveg virkilega góð "daginn eftir" kaka.  

 

Kjúklingur Tikka Masala

Það rann upp enn einn dagurinn þar sem við höfðum kjúkling. Að þessu sinni ákváðum við að halda austur fyrir alla leið til Indlands(er ekki Tikka Masala Indverskt?) Skiptir kannski ekki öllu. Kjúklingurinn var að eigin sögn með Tyrkneskt vegabréf og þar við situr. 

Ég fann uppskrift inná ljufmeti.com þar sem viðkomandi hafði eldað eftir uppskrift frá Jamie Oliver, sem hafði örugglega fengið hana hjá einhverjum öðrum o.s.frv.  Þar sem við gátum ekki nálgast hluta af hráefninu þá var þetta sniðið að okkar Tyrknesku þörfum. 

Engu að síður þá er innihaldið sem ég notaði eftirfarandi.

4 hvítlauksrif

ca 5 cm engifer, engiferið var frekar þykkt, en magnið var gott, Ef engiferið er mjórra þá lengri bút ef þykkara þá styttri bút.

1 grænt chilli, fræhreinsað

1 msk sinnepsduft(grounded mustard)

1 msk paprikuduft

2 tsk Kúmen

2 tsk kóriander

3 msk garam masala

200 gr jógúrt

4 kjúklingabringur, skornar í grófa bita

1 msk smjör

2 miðlungs laukar, afhýddir og skornir í fínar sneiðar

2 msk tómat purée

lítið handfylli af fínmöluðum cashew hnétum

sjávarsalt

200 ml rjómi

safi af 2 lime

Engiferið og hvítlaukurinn eru rifin á fínu rifjárni og sett í skál. Chilli-ið er skorið mjög fínt niður og bætt útí ásamt Sinnepsduftinu, kúmeni, Kóríander og 2 msk af garam masala. helmingnum af blöndunni er sett í aðra skál ásamt kjúklingnum og jógúrtinu. Þessu er hrært vel saman og látið standa í 30 mín eða lengur, það verður ekki verra fyrir vikið. 

Smjörið er brætt á pönnu og laukurinn steiktur, restinni af kryddblöndunni er bætt á pönnuna og þessu leyft að malla í ca 15 mínútur við vægan hita.

Tómat puré, hnetunum, ca. hálfum lítra af vatni ásamt salti er bætt útá pönnuna, þessu er hrært saman og látið malla við vægan hita í nokkrar mínútur. 

 Þar sem við eigum ekki grill þá byrjaði ég á að steikja nokkra bita, það var ekki að gera sig þar sem pannan er ekki alveg að höndla mikið marinerað hráefni. Ég mæli með að fólk reyni að grilla kjúklingabitana. Ég steikti þá í ofni sem var alls ekki slæmt í sjálfum sér en eins og ég segi þá mæli ég með að grilla þá við háan hita.

Sósan er hituð aftur og rjómanm og restinni af garam masala bætt útí, sósan er smökkuð til með kryddum ef fólk vill meira eða minna af einhverju kryddinu.. þegar suðan er kominn upp þá er slöökt undir og kjúklingnum og lime safanum bætt útí og hrært varlega saman.

Við bárum þetta fram með hrísgrjónum. Naan brauð væri ákjósanlegt en við notuðum hvítt brauð sem er alls ekki slæmt.

 þetta var helv...... gott.

 

 

Appelsínu marmelaði

Hún Helena mín, eins og áður hefur komið fram, sér um baksturinn á þessu heimili. Um daginn gerði hún Appelsínu marmelaði sem bragðaðist æðislega. 

þetta notar hún.

2 Appelsínur

Safi úr einni sítrónu

börkur af ca 1/4 sítrónu 

1 dl sykur

1 dl vatn.

Börkurinn(passa sig að hafa ekki hvíta hlutann með því þaðan kemur beiska bragðið) er tekin af báðum appelsínunum með meðal fínu rifjárni og settur til hliðar. U.þ.b  1/4 af Sítrónu berkinum er rifinn með sama rifjárni og settur til hliðar(sama regla og með appelsínubörkinn). 

Appelsínurnar eru afhýddar og hver bátur skorinn í tvennt.  Sett i pott ásamt börknum af annari appelsínunni, safanum, berkinum af sítrónunni og vatninu. Þetta er látið malla við lágan til meðalhita í ca 10 mín eftir að suðan er kominn upp og hrært í á meðan. 

Þetta er sett í matvinnsluvél og maukað saman þar til þetta er orðið að "fallegu" mauki.

þetta er sett aftur í pott og restin af berkinum ásamt sykrinum  blandað við og hrært saman í ca 5-7 mín eftir að suðan er kominn upp og hrært í á meðan. 

Í lokin er þetta sett í hreina krukku og leyft að kólna við stofuhita og kælt að því loknu.

 

Þetta er frábært marmelaði, tekur stuttan tíma að gera og passar í eina krukku.

 

Kjúklingur í kókosmjólk og Ananas safa(daginn eftir)

Oft er það nú þannig í þessum heimi að fólk, við meðtalin, veit ekki alltaf hvað það á að gera við þessa svokölluðu afganga. það er synd að henda mat og af því er alltof mikið gert. ALLTOF MIKIÐ, já heyriði það. 

Þennan rétt vorum við með um daginn

http://gunnarbjarnason.blog.is/blog/gunnarbjarnason/entry/1445595/

 Þar sem það var nóg eftir í aðra máltið þá tók rétturinn á sig töluvert aðra mynd og er kannski ósanngjarnt að kalla hann sama nafni. þar til annað og betra nafn er fundið þá heldur hann þessu nafni. þ.e Kjúklingur í kókosmjólk og ananas safa(daginn eftir). 

Það sem við gerðum var að blanda saman hrísgrjónunum og kjúklingaréttinun í einn pott. 

bætt við rjóma(ca 200 ml, fer eftir magni af afgöngum), salti og pipar, kjúklingakrafti til að rífa upp bragðið þar sem hrísgrjónin stela svolítið af bragðinu af sósunni. þetta er hitað þar til að þetta er orðið að mjúkri og fínni grýtu. 

Að þessu sinni var þetta borið fram með ristuðu brauði og bragðaðist svona fantavel.